OS GROLIÑOS DE POESÍA ESTÁN DE VOLTA...

Esta vez volven con poesías de produción propia. Alumnas e alumnos de todos os niveis estiveron traballando a creación poética:  acrósticos, caligramas, coplas, pareados, cuartetos, cuartetas, romances... todos teñen cabida nos nosos groliños de poesía. Moitos van acompañados de ilustracións de creación propia. Interesante..

 

 

 

APADRIÑAMENTO LECTOR

Estes días a biblioteca está que ferve, a todas horas está chea de grupiños de  rapaces e rapazas, grandes e pequenos... Que será o que está a acontecer?, pois nada máis e nada menos que a organización dun novo "Apadriñamento Lector". Esta actividade celebrouse por primeira vez o curso pasado cun enorme éxito, razón pola que este ano decidimos ampliar a participación: reencóntranse os padriños e madriñas de 6º de EP cos seus afillados e afilladas de 5 anos e estrease o alumnado de 5º de EP apadriñando ao alumnado de 4 anos. Os primeiros pasos xa están dados:

- Presentación das parellas:

 

 

 

- Elección dos contos por parte dos padriños e madriñas:

- E agora a esperar que continúe o bo tempo para poder saír ao campiño, e gozar das lecturas ao aire libre!!!!

Obradoiro de Poesía con Xoán Babarro

 Hoxe visitou o centro Xoán Babarro e o alumnado de quinto e sexto gozou dunha xornada poética moi interesante, na que o autor falou da poesía, do seu significado e convidou a audiencia a facer preguntas e dar respostas en torno a poemas de Rosalía, Manuel María..., entre outros. Actividades aparentemente sinxelas pero non exentas de dificultade: resumir nunha palabra un poema para buscarlle o tema, facelo logo nunha oración para explicar unha situación son algúns exemplos de como podes captar a atención arredor dun poema breve. Tivemos tamén oportunidade de traballar  sobre poemas da súa última publicación O baúl de Domingos Quintas libro de poemas que o alumnado xa coñecía. A rapazada ficou moi atenta á exposición e  participou con ansia en toda a actividade facendo preguntas realmente inxeniosas ao autor que rematou case cunha entrevista colectiva do noso alumnado ao autor, inquedanzas variadas sobre o oficio de ser escritor... 

 

Día Internacional da Muller

O Día Internacional da Muller conmemora a loita das mulleres pola súa participación en igualdade na sociedade. Segundo a ONU o 8 de marzo de 2018 é o momento para reflexionar sobre os avances logrados, pedir máis cambios e celebrar a valentía e a determinación das mulleres de a pé que xogaron un papel clave na historia dos seus países e comunidades.

Desde o noso centro e desde a propia biblioteca traballamos arreo para que  a igualdade sexa unha realidade e non unha mera declaración de intencións.

Desde hai algún tempo na biblioteca temos unha selección de lecturas para dar a coñecer mulleres que no seu día foron pioneiras en diferentes ámbitos enfrontándose ás moitas barreiras de xénero impostas e dar os primeiros pasos dunha longa andaina. O camiño andado é moito pero cómpre lembrar que en pleno século XXI vivimos situacións anacrónicas e, que en xornadas como a de hoxe tentamos visibilizar, facer patentes pero tamén darlle pulo ás inquedanzas de construír un futuro mellor e fuxir da abulia social fronte ás inxustizas. ¿Serán as nosas lectoras e lectores, mulleres e homes de futuro..., as últimas persoas que teñan que reivindicar dereitos tan obvios?

 

Xoán Babarro Taller de Poesía

O próximo venres teremos unha visita moi especial Xoán Babarro virá a compartir coas rapazas e rapaces de 5º e 6º un día moi especial para todos nós ao contarmos cun home senlleiro das nosas letras que nos axudará a mergullarnos nelas a través dun Obradoiro de Poesía.

NA LINGUA QUE EU FALO

Na lingua que eu falo

Najla Shami

Najla Shami canta a Rosalía Castro

Na lingua que elas falan, na lingua que falamos e que queremos seguir falando. Cancións dunha elegancia feliz. Músicas que son coma un tremor rosaliano. Actualización da poeta ao século XXI. E a voz de Najla Shami, desde a profundidade dun dicir e dun cantar ás veces delicado, ás veces profundo. Sempre suxestivo. "Na lingua que eu falo" é un agasallo para os corazóns. Cada canción, un latexo. Rosalía pentagramada en aires novos.